Կկայանա հայ-իսպանական միջմշակութային հանդիպում.

Հայ- իսպանական միջմշակութային հանդիպում Ալկասերում

Փետրվարի 14-ին, ժամը 20։00-ին Իսպանիայի Ալկասեր քաղաքի Սոցիալական կենտրոնում տեղի կունենա հայ- իսպանական միջմշակութային հանդիպում։

x

Այն կնախագահեն քաղաքապետ Էվա Սամորան (Eva Zamora), “Հայ ժողովրդի լավագույն բարեկամ” անվանակարգում մրցանակակիր, Միսլատայի Մշակութային Շարժում կազմակերպության նախագահ Սալվադոր Գարսիա դե լա Մոտան (Salvador García de la Mota), ,,Արարատ,, Հայկական միության նախագահ Արարատ Ղուկասյանը և Պատվավոր Հյուպատոսների Միության նախագահ Բաբկեն Սեդրակյանը։

Միջոցառումը կվարի Ալկասերում միության ներկայացուցիչ Էդիտա Գրիգորյանը։ Հանդիպման ընթացքում կհնչեն հայ գրականության գլուխգործոցներ՝ հայերենով և իսպաներենով, ապա Սալվադոր Գարսիան կներկայացնի հայ-իսպանական բարեկամության սկզբնավորման, ներկա և ապագա մարտահրավերները։

Արարատ Ղուկասյանը կներկայացնի Իսպանիայում հայկական հետքի մասին պատմող հետաքրքրաշարժ պատմություններն ու դեպքերը։

Հանդիպման ընթացքում կցուցադրվեն Հայաստանն ու Իսպանիան բնորոշող արվեստի գործեր, գրքեր, որոնցից առավել հետաքրքրական գործերը կլինեն Երևանի Ճարտարապետության և Շինարարության հայաստանի Ազգային համալսարանի դասախոս Իրինա Վանյանի յուրատեսակ տիկնիկների հավաքածուն՝ հայ_իսպանական ազգային մոտիվներով և Արարատ Հայկական միության ներկայացուցիչ Անահիտ Սարգսյանի Հայաստանին վերաբերող կտավները։ Հանդիպմանը հատուկ անդրադարձ կլինի Հայոց ցեղասպանությանը, որը կկրի “Երբ է որոշվել իրականացնել Հայոց ցեղասպանությունը” խորագիրը։ Այն կփորձի պատասխանել 20-րդ դարի առաջին ցեղասպանության պատճառներին ու հետևանքներին վերաբերող հարցերին, գտնել հետագա ցեղասպանությունների և այլ ոճիրների կանխարգելման միջոցները և հաստատել արդարադատությունը։ Նման հանդիպումները կնպաստեն մարդասիրական արժեքների ամրապնդմանը, միջմշակութային կապերի սերտացմանն ու համակեցությանը։

Վերջում ներկաները կհամտեսեն հայ-իսպանական խոհանոցի համեղ խորտիկները։