Ի՞նչ փուլում է մետրոյի «Սուրմալու» կայարանի կառուցումը․ մանրամասներ

 Մետրոյի «Սուրմալու» նոր կայարանի կառուցման, նախագծային աշխատանքների ձեռքբերման տեխնիկական առաջադրանքի նախագիծը մասնագիտական խմբի նիստում քննարկվել է հոկտեմբերի 17-ին: Որոշում է կայացվել, որ նախագիծը վերանայվի, վերամշակվի, լրամշակվի՝ ներառելով նաև տեխնիկատնտեսական ուսումնասիրություն անելու որոշակի բաղադրիչը:

Այս մասին Երևանի քաղաքապետարանի գործակարգավարական խորհրդակցության ժամանակ զեկուցեց Երևանի քաղաքապետի խորհրդական Անետա Բաբայանը՝ անդրադառնալով «Սուրմալու» առևտրի կենտրոնի հարակից տարածքում մետրոյի նոր կայարանի կառուցման նպատակով մրցույթ հայտարարելու գործընթացին:

Ըստ նրա՝ խնդիրը, որ դրվել է այս փուլում, նախագիծն արտաքին փորձագիտական համայնքին կամ միջազգային կառույցներին ուսումնասիրության և կարծիքների համար տրամադրելն է:

«Մեր լավագույն պատկերացումներով, եթե մինչև ամսվա վերջ մասնագիտական խմբի հաջորդ նիստը կայանա, և լրամշակված նախագիծը հաստատվի, մենք կգնանք արդեն մրցութային գործընթացի փուլին:

Ձեր հանձնարարությամբ (դիմում է քաղաքապետ Տիգրան Ավինյանին – խմբ.) նախնական բանակցություններ են տարվում նաև միջազգային կառույցների հետ ծրագրի հավանական ֆինանսավորման կապակցությամբ, և առաջիկայում արդեն նախապատրաստվում են տեղական այց, առաքելություն, որի ընթացքում հանդիպումներ կլինեն, և ծրագրի ավելի մանրամասն ուսումնասիրություն կարվի, որպեսզի բանակցությունները մտնեն ավելի դետալացված փուլ:

Զուգահեռաբար քննարկվում է նաև հանրային ներդրումային ծրագիրը, որպեսզի Կառավարության ընթացակարգերով ընթացք ստանա»,- զեկուցեց Անետա Բաբայանը:

Ձեզ կեհաքրքրի...