Ծրագրավորման գրասենյակի վրա հարձակումը բացահայտվել է. ձերբակալվել են իրանցիներ

Հուլիսի 11-ին ոստիկանության Արաբկիրի բաժնի ՔՀԲ-ում օպերատիվ տվյալներ էին ստացվել, որ ժամը 17.30-ին դիմակավորված չորս անձինք մուտք են գործել Վ. Փափազյան փողոցում գործող ՍՊ ընկերության տարածք և զենքի սպառնալիքով հափշտակել սեփականատիրոջն ու ընկերներին պատկանող ոսկյա շղթան, փող, բջջային հեռախոս ու դիմել փախուստի:

Դեպքի վայր էր մեկնել օպերատիվ-քննչական խումբ:

x

Նույն օրը, ժամը 21.02-ին, ԻԻՀ 49-ամյա քաղաքացին հաղորդում էր տվել, որ 4 անհայտ անձինք ապօրինի մուտք են գործել իր վարձակալած ծրագրավորման գրասենյակ և զենքի ու դանակի սպառնալիքով հափշտակել բջջային հեռախոս, իր անձնագիրը, 70.000 դրամ, պարանոցից՝ ոսկյա շղթան, իսկ ընկերոջ պարանոցից հափշտակել են ոսկյա շղթան, ոսկյա թևնոցը, «Սամսունգ» խելացի ժամացույցը, ԻԻՀ վարորդական իրավունքի վկայականը և 2 էլեկտրական կրիչ:

Դեպքի վայրի զննությամբ հայտնաբերվել են ատրճանակի նմանվող առարկա, կպչուն ժապավեն, պլաստմասե ամրաններ, աչքերը կապելու կապիչներ, պոլիէթիլենային տոպրակ և մկրատ:

Քրեական հետախույզների ձեռնարկած օպերատիվ-հետախուզական միջոցառումների շնորհիվ պարզվել է հանցագործությունը կատարողների և օժանդակողի ինքնությունը:

Հանցագործությանն օժանդակողը՝ ԻԻՀ 36-ամյա քաղաքացին, Մաշտոցի պողոտայում հայտնաբերվել, ձերբակալվել և ներկայացվել է ոստիկանության Արաբկիրի բաժին: Նա ներկայացվել է նախաքննական մարմնին:

Հուլիսի 11-ին ՀՀ քրեական օրենսգրքի 252-րդ հոդվածի (Ավազակությունը) 2-րդ մասի հատկանիշներով նախաձեռնվել է քրեական վարույթ:

Ոստիկանության Արաբկիրի բաժնի և Երևան քաղաքի վարչության քրեական հետախույզները համատեղ ձեռնարկած օպերատիվ-հետախուզական միջոցառումների արդյունքում պարզել են, որ հանցագործությունը կատարած, ազգությամբ պարսիկ երեք երիտասարդները Երևանի Գրիգոր Արծրունու փողոցից նստել են «Օպել» մակնիշի տաքսին և ուղևորվել

Մեղրիի սահմանային անցակետ:

Արաբկիրի բաժնի քրեական հետախույզները, համագործակցելով ոստիկանության Երևան քաղաքի վարչության և Մեղրիի բաժնի ծառայողների հետ, ավազակային հարձակում կատարելու կասկածանքով, Մեղրի-Ագարակ ճանապարհահատվածում հայտնաբերել և ձերբակալել են հանցագործությունը կատարած եռյակին, որոնցից մեկի անձնական խուզարկությամբ հայտնաբերվել է գողոն հանդիսացող ոսկյա շղթան:

Նրանք ներկայացվել են նախաքննական մարմնին:

Կատարվում է նախաքննություն։