Հարկադրված միջոցառումն անում ենք մանկապարտեզների աշխատակիցների ու երեխաների անվտանգությունից դրդված. փոխքաղաքապետ

-Իրենց «սովորական» մանկապարտեզները հիմնականում տանը մոտ են, տեղափոխվելու խնդիր չկա, մինչդեռ այս շրջանում ստիպված են լինելու երկար ճանապարհ անցնել, երբեմն՝ տրանսպորտի վրա լրացուցիչ գումար ու ավելի շատ ժամանակ ծախսել, հերթապահ մանկապարտեզներ հասնելու համար:

Բոլոր այս խնդիրները հասկանալի են, բոլորս էլ բախվում ենք բոլոր անհարմարություններին, որ հետը բերել է չարաբաստիկ համավարակը՝ սկսած դիմակ կրելուց, մինչ ճամփորդելու և մեր ավագ հարազատներին տեսնելու արգելքը:

Ու թերևս ավելորդ չի նշել, որ այս հարկադրված միջոցառումն անում ենք մեր մանկապարտեզների աշխատակիցների ու երեխաների անվտանգությունից դրդված. «սովորական» ժամանակներում մանկապարտեզներում աշխատում է շուրջ 4500 մարդ, այս միջոցառման շնորհիվ նրանց մեծ մասը տանը կմնա (իհարկե, շարունակելով վճարվել), հերթապահ մանկապարտեզներում կաշխատի մոտ 500 մարդ:

Իսկ երեխաները, որոնք արդեն ադապտացված են մանկապարտեզի միջավայրին, կկարողանան նաև ծնողների օգնությամբ ավելի հեշտ հարմարվել այս նոր իրավիճակին:

Սա իսկապես անհրաժեշտ միջոցառումներից մեկն է, եթե ուզում ենք հնարավորինս շուտ ու քիչ խնդիրներով վերադառնալ բնականոն կյանքի հունին:

Ամեն դեպքում, քաղաքային իշխանությունը հայցում է երևանցիների ներողամտությունը՝ ստեղծված անհարմարությունների համար և վստահություն հայտնում, որ միահամուռ ջանքերով կհաղթահարենք դժվար ժամանակները:

Շնորհակալություն ըմբռնումով մոտենալու համար»,- գրել է նա Ֆեյսբուքի էջում: