7 ծրագիր աշխատանքը հեռահար կազմակերպելու ու ժամական արդյունավետ կառավարելու համար

Համազգային կարանտինի օրերին շատերը չեն պատկերացնում ՝ ինչպե՞ս են կազմակերպելու իրենց հեռահար աշխատանքը: Հաճախ դա ունի օբյեկտիվ պատճառներ, քանի որ օրինակ՝ շինարարությունը հեռահար չես կազմակերպի: Սակայն եթե մի կողմ դնենք այն աշխատանքներն ու մասնագիտությունները, որոնք մարդկային ֆիզիկական ուժ ու ներկայություն են պահանջում, մնացած բոլոր դեպքերում հնարավոր է աշխատանքը կազմակերպել հեռակա կարգով, առանց արդյունավետության կորստի: Բողոքողները պարզապես չգիտեն այս հրաշք հավելվածների մասին: Ձեզ ենք ներկայացնում 7 ծրագիր ու հավելված, որոնք կօգնեն կազմակերպել Ձեր հեռահար աշխատանքն ու գործնական հանդիպումները:

1.HipChat

HipChat-ը կորպորատիվ չատի համաշխարհային առաջատարներից է: Հավելվածի միջոցով կարող եք շփվել տարբեր խմբերով, խմբակային հանձնարարություններն ավելի օպերատիվ տեղ հասցնելու համար: Կա նաև առանձին նամակներ գրելու հնրավորություն: Հիմնական գործառույթներն անվճար են: Այս ցուցակում մտնում է խմբակային չատը, ֆայլերի փոխանակումը, այլ ծառայություններ ու հավելվածներ ներգրավելու հնարավորությունն ու անսահմանափակ մարդկանց ներգրավելու հնարավորությունը: Վճարովի փաթեթի մեջ են մտնում տեսազանգի հնարավորությունը, տվյալները պահպանելու անսահմանափակ ծավալ և էկրանի փոխանակում: HipChat-ում հնարավոր է ներդնել ավելի քան 130 հավելյալ ծառայություններ (օր.՝ Jira, Trello, Google Drive և այլն): Այս ծառայությունը կենտրոնացած է հիմնականում բիզնեսի վրա, այդ պատճառով այստեղ հատկապես ուշադրություն են դարձնում անվտանգությանը, տվյալների պահպանությանն ու հարմարավետությանը: Այստեղ կա չատերն արխիվացնելու հնարավորություն, նաև կարող եք արխիվացրած չատերում փնտրել ձեզ այդ պահին հարկավոր երկխոսությունը: Հնարավոր է ստուգել, ո՞վ է այդ պահին միացել ցանցին ու վերահսկել, թե տվյալ անձը ո՞ր երկխոսություններին կարող է հասանելիություն ունենալ: Հասանելի է ինչպես համակարգչում, այնպես էլ սմարթֆոններում(SMS, iPhone, Android): Կա նաև հավելվածի վեբ տարբերակը:

x

2. Slack

Շատ հարմար գործիք է ներթիմային քննարկումների համար: Նախորդի պես ունի խմբակային ու անհատական երկխոսությունների հնարավորություն: Ավելին, անհրաժեշտության դեպքում կարող եք Ձեր հաճախորդին կամ պատվիրատուին հրավիրել միանալու երկխոսությանը (հրավերը գնում է տվյալ անձի էլեկտրոնային հասցեին): Ծրագիրը պահպանում է բոլոր երկխոսությունները, փոխանցված ֆայլերը, հնարավորություն ունի ընդգծել կարևոր նամակները: Կարող եք կարգավորել, որպեսզի էլեկտրոնային փոստին ծանուցումներ գան ու սինխրոնացնել տվյալները բոլոր սարքավորումների վրա (համակարգիչ, հեռախոս, պլանշետ): Կարող եք ներգրավել նաև այլ ծառայություններ, օրինակ՝  Skype, Dropbox, Google Calendar և այլն:

3. Trello

Սա օնլայն հարթակ է: Տարբեր նախագծերի արդյունավետ կառավարման համար սա կատարյալ գործիք է: Այն հնարավորություն է տալիս կառավարել ու վերահսկել նախագծի իրականացման յուրաքանչյուր էտապը: Ծրագրի կառուցվածքն ավելի քան պարզ է, այն կազմված է մի քանի պատուհաններից (քանակը Դուք եք որոշում): Յուրաքանչյուրում առանձին նախագծի տվյալներն են կամ մեկ նախագծի յուրաքանչյուր փուլում կատարված աշխատանքի արդյունքներն ու հանձնարարականները: Այս կերպ Trello-ն դառնում է նաև ժամանակի արդյունավետ կառավարման լավագույն ընկերը: Յուրաքանչյուր հանձնարարություն բաժանվում է ենթախմբերի, որոնք էլ իրենց հերթին կարող են ուղեկցվել մեկնաբանություններով, դեդլայններով, տարատեսակ թեգերով ու կցված ֆայլերով: Այլ ռեսուրսների հետ կցելու հնարավորություն էլ կա: Դա հնարավոր է անել հատուկ պլագիններով: Օրինակ կցել Google-ի օրացույցը, որը հնարավորություն կտա տեսնել Ձեր վերջնաժամկետները երկու հարթակներում էլ:

4. Worksection

Սա գրեթե անվճար օնլայն հարթակ է: Համակարգչում կամ սմարթֆոնում ներբեռնելու կարիք ու հնարավորություն չկա: Հարթակում կարող եք իրականացնել մինչև երկու նախագիծ, դրանից հետո պետք է վճարեք: Կարող եք ներգրավել Google Drive հարթակը, նաև Ձեր գործընկերներին ու հաճախորդներին, որոնք կարող են ուղիղ ժամանակով հետևել ծրագրի իրականացման ընթացքին ու հընթացս ասել իրենց նկատառումներն ու նկատած թերությունները: Ինտերֆեյսը շատ ինտուիտիվ է ու տրամաբանական: Նաև շատ անվտանգ: Եթե գործին ներգրավված է որևէ ֆրիլանսեր, կարող եք հանգիստ լինել, նա հասանելիություն կունենա միայն իրեն վերաբերող ֆայլերին ու երկխոսություններին:

5. Pomodoro

Սա հասարակ, պարզ ու հասանելի ժամանակացույց է: Օնլայն հարթակ է, որևէ տեղից ներբեռնելու կարիք չկա: Օգտագործելու համար պետք է գրանցվեք (անվճար): Աշխատանքային ժամանակահատվածի ավարտին (25 րոպե) թայմերը զրնգում է ու ազդարարում 5 րոպեանոց ընդմիջում: Մեծ ընդմիջումը տևում է 15 րոպե: Աշխատանքային ժամանակահատվածն առաջ տալու հնարավորություն չկա, ընդհանրապես թայմերի հետ որևէ մանիպուլյացիայի հնարավորություն չկա:

6. Forest: Stay focused, be present

Այ սա իսկական նվեր է բոլոր այն մարդկանց համար, որոնք չեն կարողանում կենտրոնանալ աշխատանքի վրա: Երբ Google Chrome բրաուզերում կարգավորում եք այս հավելվածը, դուք պետք է նշեք բոլոր այն կայքերի հասցեները, որոնք աշխատանքի ընթացքում շեղում են Ձեզ (նախապես կան ներդրված երեք կայքեր՝ Facebook, Reddit և YouTube):  Երբ սեղմում եք թայմերի վրա, սկսվում է հետհաշվարկը: Այդ ընթացքում բրաուզերում բացված պատուհանում վիրտուալ ծառ է աճում: Եթե մտնեք արգելված ու շեղող կայքերից որևէ մեկը, Ձեզ ծանուցում կգա, որ ծառը դեռ շարունակում է աճել: Սեղմեք «Give up!» կոճակը: Իհարկե դուք կմտնեք օրինակ՝ Facebook, սական ձեր վիրտուալ ծառը տեղում կչորանա, իսկ հավելվածը Ձեզ կտեղեկացնի, որ տապալել եք հանձնարարությունը: Իսկ եթե զսպեք Ձեզ ու չմտնեք, հավելվածը կասի, որ դուք մեծ ու առողջ ծառ եք աճեցրել: Դուք կարող եք «+» կոճակը սեղմելով սև ցուցակում հընթացս ավելացնել բոլոր այն կայքերը, որոնք շեղում են Ձեզ: Ծառը աճելու ժամանակահատվածը տատանվում է 25-120 րոպե: Ժամանակը Դուք եք որոշում:

 6. Toggl

Toggl-ը դա ժամանակն արդյունավետ կառավարելու գործիք է: Կարգավորում եք այն ու սեղմում «Play»: Ծրագիրը սկսում է հաշվել այն ժամանակը, որ ծախսում եք աշխատանքի վրա: Ընդմիջումների կամ աշխատանքն ավարտելու ժամանակ կանգնեցնում եք թայմերը ու ծրագիրը ցույց է տալիս ոչ միայն ծախսած ժամանակը այլև հենց ժամը, օրինակ՝ 14:23-14:54: Կարող կարգավորել և՛ Ձեր ժամանակը, և՛ աշխատակիցների, և հասկանալ՝ ինչքա՞ն ժամանակ են ծախսում այս կամ այն նախագծի վրա: Ծրագիրը շատ հեշտ կարելի է կցել տարատեսակ task manager-ների (Asana, Basecamp, TeamWeek և այլն): Հնարավոր է նաև վիճակագրություն վարել և հասկանալ, արդյունավե՞տ եք աշխատում, թե՞ հավելյալ միջամտության կարիք կա:

7. RescueTime

Այս ծրագիրն աշխատում է շոկային թերապիայի մեթոդով: Կարգավորելուց հետո Դուք չեք տեսնում նրա աշխատանքը: Այն աշխատում է ստվերում: Օրվա վերջում, երբ մտնում եք Ձեր անձնական հաշիվ ու տեսնում եք, որ աշխատանքային օրվա մեծ մասը տրամադրել եք Facebook-ին, մի տեսակ այնքան էլ հաճելի չի լինում (եթե աշխատանքը կապված չէ Facebook-ի հետ):

Եթե իսկապես ցանկանում եք կառավարել Ձեր ժամանակն ու գործատուին օրվա վերջում ցույց տալ աշխատանքի արդյունավետությունը (սքրինշոթ շատ գեղեցիկ գրաֆիկով), ապա այս ծրագիրը հենց Ձեզ համար է:

ittrend.am