Դատարանը սանկցիա կիրառեց Քոչարյանի փաստաբանների նկատմամբ (տեսանյութ)

Երևանի ընդհանուր իրավասության դատարանի Շենգավիթ նստավայրում դատավոր Աննա Դանիբեկյանի նախագահությամբ ընթանում է Ռոբերտ Քոչարյանի և մյուսների գործով դատական նիստը։

Նիստի սկզբում Աննա Դանիբեկյանը նշեց, որ դատարանը անցնում է փաստաբանների վարքագծի քննարկմանը: Հայկ Ալումյանը նշեց, որ նախորդ նիստին իր չներկայանալը եղել է կարծիքի արտահայտման միակ ձևը.

x

Հիշեցնենք, որ նախորդ դատական նիստը հետաձգվեց, քանի որ չէին ներկայացել Ռ․ Քոչարյանի պաշտպաններ Արամ Օրբելյանը, Հայկ Ալումյանը, Հովհաննես Խուդոյանը, Արամ Վարդևանյանն ու Ռուբեն Սահակյանը՝ պատճառաբանելով, որ զրկված են իրենց իրավունքները և պարտականությունները կատարելու հնարավորությունից։ Նույն պատճառաբանությամբ նիստին չեն ներկայացել նաև Արմեն Գևորգյանի պաշտպանները։

«Քանի որ նախորդ նիստերից մեկում հնչել է արտահայտություն, որի իմաստը չհասկանալու համար ես խնդրեցի պարզություն մտցնել, և փոխանակ Դուք պարզեիք՝ ինչ նկատի ուներ տուժողի իրավահաջորդ էդիկ Հարությունյանը, որևէ կերպ չարձագանքեցիք: Երկու շաբաթ հետո միայն՝ նախորդ դատական նիստում, փորձեցիք պարզել, թե ինչ է նկատի ունեցել: Եթե երկու շաբաթ հետո որոշեցիք ճշտել, մենք մտածեցինք, որ Ձեր սխալը հակացաք, որոշեցինք այս նիստին մասնակցել: Դուք հասկացաք, որ մենք ճիշտ էինք, Դուք՝ սխալ»,- ասաց փաստաբանը:

Արամ Օրբելյանն էլ նշեց, որ ուսումնասիրել է կանոնոնակարգը և խմբային սանկցիայի կիրառում չի տեսել: Եվ ավելացրեց, որ երկու նիստերի չի ներկայացել իր անվտանգության համար, քանի որ հնչել են սպառնալիքներ: Մինչդեռ, ըստ նրա, պաշտպանները իրենց ելույթների ժամանակ, բացի իրավական և փաստական հանգամանքներից այլ բանի մասին չպետք է մտածեն:

«Իմ գործընկերների բացակայությունը պայմանավորված է եղել դատավորի գործողություններով, մտածեք Բարձրագույն դատական խորհուրդ դիմելու և Ձեր գործողություններին գնահատական տալու»,- ասաց փաստաբան Հովհաննես Խուդոյանը:

Քոչարյանի փաստաբանական թիմի մյուս անդամները և Արմեն Գրիգորյանի պաշտպանները ևս նույն հիմնավորումով հանդես եկան:

Փաստաբանների խոսքից հետո Դատավոր Աննա Դանիբեկյանը նշեց, որ դատարանը արձանագրում է , որ պաշտպանների վարքագիծը միտված է եղել դատական նիստի բնականոն ընթացքը խոչընդոտելուն։ Դատարանը որոշեց կիրառել դատական սանկցիա փաստաբանների նկատմամբ: